សមាជិកថ្មី៦នាក់ចូលជំរំហ្វឹកហាត់ជាមួយក្រុមបាល់ទះបុរសក្នុងសាលត្រៀមស៊ីហ្គេមឆ្នាំ២០២៣
បន្ទាប់ពីមានសហការរវាងក្លិបបាល់ទះពាក់ព័ន្ធនានា ជាមួយសហព័ន្ធកីឡាបាល់ទះកម្ពុជា ពេលនេះកីឡាករថ្មីចំនួន៦រូប បានធ្វើដំណើរចូលរួមបោះជំរំជាមួយក្រុមបាល់ទះជម្រើសជាតិបុរសកម្ពុជា ហើយ ក្នុងត្រៀមខ្លួនហ្វឹកហាត់រួមគ្នា ដើម្បីទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ២០២៣ ខាងមុខ។
ក្នុងឱកាសចូលជំរំហ្វឹកហាត់សុក្រ ទី២៦ ខែកក្កដា ឆ្នាំ២០២២ នេះ លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានសំណេះសំណាលជាមួយសមាជិកថ្មីទាំង៦ ផងដែរ។
កីឡាករទាំង៦រូបមាន កីឡាករ ប៊ន ណារិទ្ធ, មឿន ម៉េងឡាយ, មាស វាសនា, ខុម ហុងទ្រី មកពីក្លិបកីឡាបាល់ទះក្រសួងមហាផ្ទៃ កីឡាករ សេង គឹមហាប់ មកពីសមាគមកីឡាបាល់ទះខេត្តសៀមរាប និងកីឡាករ ឌិន ស៊ីដែន មកពីក្លិបកីឡាបាល់ទះស្នងការដ្ឋាននគរបាលខេត្តកំពង់ចាម។
សហព័ន្ធកីឡាបាល់ទះកម្ពុជា សូមថ្លែងអំណរគុណដល់ក្លិបបាល់ទះនានាដែលបានអនុញ្ញាតឱ្យកីឡាកររបស់ខ្លួន ចូលរួមក្នុងក្រុមជម្រើសជាតិកម្ពុជា ដើម្បីត្រៀមប្រកួតតំណាងឱ្យជាតិនាពេលខាងមុខ៕
