ឯកឧត្តម ស សុខា រដ្ឋលេខាធិការក្រសួងអប់រំយុវជននិងកីឡា និងជាអនុប្រធានសហព័ន្ធកីឡាបាល់ទះកម្ពុជា តំណាងឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន ប្រធានសហព័ន្ធកីឡាបាល់ទះកម្ពុជា បានជួបសំណេះសំណាលជាមួយថ្នាក់ដឹកនាំ ប្រតិភូ គ្រូបង្វឹក កីឡាករកីឡាការិនី បាល់ទះអង្គុយ ចំនួន២៦រូប នៅព្រឹកថ្ងៃចន្ទ ទី២៥ ខែកក្កដា ឆ្នាំ២០២២ នេះនៅមជ្ឈមណ្ឌលជាតិហ្វឹកហ្វឺននិងកីឡា ក្នុងរាជធានីភ្នំពេញ មុនពេលកីឡាករកីឡាការិនី ធ្វើដំណើរទៅប្រកួតក្នុងព្រឹត្តិការណ៍កីឡាអាស៊ានប៉ារ៉ាហ្គេម ឆ្នាំ២០២២ នៅទីក្រុង Solo ខេត្ត Central Javaប្រទេសឥណ្ឌូណេស៊ី។
នៅក្នុងពិធីនេះដែរឯកឧត្តមសន្តិបណ្ឌិត នេត សាវឿន បានជូនថវិកាដល់គ្រូបង្វឹក កីឡាករនិងកីឡាការិនីម្នាក់ៗចំនួន២០០ដុល្លារ ខណៈឯកឧត្តម ស សុខា បានឧបត្ថម្ភថវិកាបន្ថែម៥០០ដុល្លារអាមេរិក ជូនឯកឧត្តម យី វាសនា ដើម្បីចំណាយលើបញ្ហាទូទៅនៅអំឡុងពេលស្នាក់នៅនិងប្រកួត ឯប្រទេសឥណ្ឌូណេស៊ី។
